Kartoshkali bo’g’irsoq (pirojki) tayyorlash retsepti — bosqichma-bosqich

Qovurma kartoshkali bo’g’irsoq (pirojki) retsepti juda oson va tayyorlash uchun oz vaqt talab qiladi. O’z yaqinlaringizni mazali pishiriq bilan siylang. Axir, issiqqina kartoshkali bo’g’risoq juda mazali, ayniqsa sous bilan tortiq qilinganda.

Kartoshkali bo’g’irsoq tayyorlash retsepti

Kerakli masalliqlar

Xamiri uchun:

• Un — 0,5 kg
• Kefir yoki smetana — 1 stakan
• Tuxum — 1 dona
• Iste’mol sodasi — 1/3 choy qoshiq
• Tuz — 1/3 choy qoshiq
• Sariyog’ yoki margarin — 50 g (ta’bga ko’ra)

Nachinkasi uchun:

• Kartoshka — 3 dona
• Piyoz — 1-2 dona
• O’simlik moyi — 4 osh qoshiq
• Ta’bga ko’ra tuz, qalampir

Tayyorlash bosqichlari

Nachinkasi:

1. Avvalo pirojkining nachinkasi tayyorlab olinadi. Uchta kartoshka tuzli suvda qaynatishga qo’yiladi. Ikkita piyoz yupqaroq halqa qilib to’g’raladi, 4 osh qoshiq o’simlik moyida yumshaguncha qovurib olinadi.
2. Pishgan kartoshka eziladi, zarur bo’lsa, biroz qaynoq suv qo’shiladi (nachinka quruq bo’lmasligi uchun).
3. Kartoshkaga qovurilgan piyoz va 30 gramm sariyog qo’shiladi. Tuzi rostlanadi, ta’bga ko’ra qalampir qo’shiladi. Nachinka tayyor.

Xamiri:

1. Idishga 1 stakan qatiq yoki smetana, 1/3 choy qoshiqdan iste’mol sodasi va tuz, 1 ta tuxum qo’shiladi va aralashtirib olinadi. Asta-sekin un qo’shgan qolda yumshoq xamir qoriladi.
2. Xamir tayyor bo’lgach, darhol uni kesib olish kerak. Smetana yoki qatiq tarkibidagi kislota iste’mol sodasi bilan reaktsiyaga kirishib, karbonat angidrid gazini ajratib chiqaradi, xamir uzoq muddat qorilsa, u havoga uchib ketib qolishi mumkin. Natjiada xamir zich bo’lib qoladi, bu esa eng kerak bo’lmagan holat.
3. Tayyor xamir ikkiga bo’linadi, har bir bo’lak uzunchoq qilib olinadi va 10 ta bo’lakka bo’linadi.
4. Har bir bo’lakcha qalinligi taxminan 2 mm qilib aylana shaklida yoyiladi, o’rtasiga bir yarim osh qoshiq nachinka qo’yiladi. Chetlari qayiqcha shaklida qilib birlashtiriladi va yaxshilab qisib chiqiladi.
5. O’rtacha balandlikda bo’lgan olovda, o’simlik moyida bo’g’irsoqlar har ikki tomonidan jigarrang qobiq hosil bo’lgunicha qovurib olinadi. Pishirish davomida tovadagi moy balandligi bo’g’irsoqlarni yarimigacha bo’lishi kerak.
6. Tayyor bo’lgan bo’g’irsoqlar qog’oz salfetkaga qo’yiladi, ortiqcha yog’i shimilgach, likopchaga solib, dasturxonga issiqligida tortiq qilinadi. Yoqimli ishtaha!

Tavsiyalar

• Agar nachinkaga maydalangan ko’katlar qo’shilsa, uning ko’rinishi ham, mazasi ham ajoyib bo’ladi.
• Xohishga ko’ra bo’g’irsoqlarni achitqili xamirdan tayyorlash ham mumkin.
• Dasturxonga pomidor va sarimsoq aralashmasidan iboat sous bilan tortiq qilish mumkin.