Krem tayyorlash usullari — tort uchun qaymoqli, tuxumli, qaynatma va sariyog’li

Kremsiz an’anaviy tortni tasavvur qilish qiyin. Mazali krem har doim tortning asosiga urg’u beradi, xoh u biskvit, qumoq yoki boshqa hamir turidan tayyorlangan bo’lsin. Quyida sizga tort uchun 5 ta eng ajoyib kremlar retsepti havola etiladi.

Krem — tuxuming oqi, qaymoq, smetana, sariyog’, tuxum, shakarni urib ko’pirtirish orqali tayyorlangan aralashma. Kremga boshqa mahsulotlar ham qo’shiladi, masalan, jelatin. U tumux oqidan, qaymoqli, smetanali, sariyog’li, qaynatma, shuningdek, bu kremlarning turli xil versiyalari turli xil qo’shimchalar bilan tayyorlanadi.

Krem yordamida tort bezatish yoki tort korjlarini ustma-ust qilib terish mumkin. Tortni krem bilan bezatishning eng oson usuli — uning yuzasiga krem qo’yib, pichoq, sanchqi yoki boshqa anjom yordamida uni tekislab chiqishdir.

Qandolat xaltachasi va turli nasadkalar yordamida tort yoki pishiriqlarga turli naqshlar berish mumkin. Agar qandolat xaltachasi bo’lmasa, uning o’rniga pishirish qog’ozini moslash (konus qilib) mumkin. Qog’ozning uchini to’g’ri, burchak ostida yoki qirrali qilib kesib, qandolat mahsulotiga kremdan turli gullar chizsa bo’ladi.

Krem — sifati tez buziladigan mahsulot. Tayyorlagandan so’ng uni muzlatgichda saqlash kerak, krem li tort ham muzlatgichda 3 dan 40 soatgacha saqlanishi mumkin. Endi bevosita krem tayyorlash haqida.

Maqolada:

Tuxumli krem

Bu krem shakar yoki shakar upasi bilan urib ko’pirtirilgan tuxum oqidan tayyorlanadi. Bunday kremni xom yoki qaynatma qilib, shuningdek, turli qo’shimchalar bilan tayyorlash mumkin. Qaynatma turi xom tuxumni ishlatishni xush ko’rmaydiganlar uchun mos keladi. Tort uchun bu krem ayni muddao.

Tuxum oqidan qaynatma krem qanday tayyorlanadi?

Kerakli masalliqlar:

2 ta tuxum oqi
Shakar yoki shakar upasi — 5 osh qoshiq
Suv — 30 ml
Limon sharbati — 1 choy qoshiq

Tayyorlash jarayoni:

Idishga suv, limon sharbati va shakar solib, muntazam aralashtirib turgan holda o’rta olovda sirop tayyorlash kerak bo’ladi. Sirop tayyor bo’lganini bilish uchun uni qoshiqqa olib, qay tarzda oqishini kuzatish kerak, agar ingichka ipdek bo’lib oqsa, hali tayyor emas, agar qalin bo’lib, asta harakatlana boshlasa, demak tayyor. Agar sirop yetarlicha qaynamasa, krem barqaror bo’lmaydi.

Sovutilgan tuxum oqi quyuq holatgacha urib ko’pirtiriladi. Keyin asta-sekin urishda davom etgan holda u siropga qo’shiladi. Tuxum oqining barchasi qo’shib bo’lingach, kremni yana taxminan 3-4 daqiqa urishda davom etish kerak.

Qaymoqli krem

Qaymoqli krem urib ko’pirtirilgan qaymoqdan tayyorlanadi. Krem ajoyib ta’mi bilan ajralib turadi. U mayin, yengil, havodor bo’ladi.

Qaymoqni yaxshi sovutilgan holda ko’pirtirish osonroq. Krem uchun yog’ foizi 33% yoki 35% bo’lgan qaymoq olish yaxshi. Qaymoqdan tayyorlangan kremga jelatin, tuxum, turli xil mevalar qo’shish ham mumkin. Bundan tashqari, uning qahva, shokolad, kakao kukuni, asal, alkogol, yong’oq va boshqa masalliqlar solib tayyorlanadigan retseptlari ham mavjud.

Kremni bevosita tortga surtishdan oldin tayyorlash va sovutgicha 3 soatdan ortiq bo’lmagan vaqt davomida saqlash kerak. U tortlarni bezatish va korjlar orasiga surtish uchun ishlatiladi.

Ananasli qaymoqli krem retsepti

Kerakli masalliqlar:

Qaymoq — 1 stakan
Jelatin — 1 choy qoshiq
Shakar upasi — 1-2 osh qoshiq
Ananas (maydalangan) — 4-6 osh qoshiq
Vanilli shakar — tabga ko’ra

Tayyorlanishi:

Jelatinga biroz suv quyib (sut quysa ham bo’ladi), tindirishga qoldiriladi. So’ng uni suv hammomi yoki past olovda to’liq erigunicha aralashtirib olish, bunga erishilgach, sovutish kerak. Oldindan sovutilgan qaymoq asta-sekin shakar qo’shgan holda ko’pirtirilib, vanilli shakar qo’shiladi. So’ng, urishda davom etib, ingichka qilib quygan holda jelatin qo’shiladi. Kremga maydalangan ananas qo’shiladi va ehtiyotkorlik bilan aralashtiriladi. Kremni tayyor bo’lishi bilanoq tortga surtish kerak.

Smetanali krem

Smetanadan tayyorlanadigan krem juda mazali va qaymoqli kremga qararganda kamroq kaloriyaga ega. Krem uchun 30% yog’li bo’lgan yangi smetanadan foydalanish tavsiya etiladi. Yog’ foizi kamroq bo’lganda krem tayyorlash uchun mos kelmaydi.

Bu holda ham smetanani dastavval sovutib olish kerak, shunda krem yaxshiroq ko’piradi va barqaror bo’ladi. U jelatinsiz, yoki jelatin, sariyog’ qo’shgan holda tayyorlanadi. Ushbu kremni tayyorlab bo’lgach, darhol tortga surtish yoki sovuq joyda 2 soatdan ortiq bo’lmagan vaqt saqlash tavsiya etiladi. Smetanali krem biskvitli tortning korjlari orasiga surtish uchun ishlatiladi.

Smetanadan kakaoli krem tayyorlash

Kerakli masalliqlar:

Smetana (yog’li) — 1 stakan
Shakar kukuni — 1-2 osh qoshiq
Kakao kukuni — 1 osh qoshiq
Vanil — pichoqning uchida

Tayyorlash:

Sovutilgan smetana asta-sekin shakar qo’shib ko’pirtiriladi, vanil qo’shiladi. So’ng kakao kukuni qo’shiladi va ehtiyotkorlik bilan aralashtiriladi. Bundan tashqari, kakao kukunini shakar upasi bilan oldindan aralashtirib olib, smetanani ko’pirtirish bosqichida qo’shish ham mumkin. Krem tayyor bo’lgach, iloji boricha tezroq ishlatish va uzoq saqlamaslik tavsiya etiladi.
Smetanali kremdan asalli tort retsepti→

Sariyog’li krem

Sariyog’li krem ancha barqaror va uzoqroq saqlanadi. Yog’li kremlar sut, suyultirilgan sut, tuxum, shakar upasi va shakar sirop asosida tayyorlanadi. Har xil qo’shimchalar — meva va reza sharbatlari, asal, yong’oqlar, choy, shokolad — yog’li krem mazasiga yanada maza qo’shadi.

Krem tayyorlanganidan keyin darhol ishlatiladi yoki oldindan tayyorlab, sovuq joyda saqlanadi — tarkibiga qarab, u bir kundan bir necha kungacha saqlanishi mumkin.

Limon + quyultirilgan sut asosli yog’li krem

Tarkibi:

Sariyog’ (tuzlanmagan) — 250 g
Quyultirilgan sut — 10 osh qoshiq
Limon — 1 dona

Tayyorlash:

O’rta kattalikdagi limon po’sti qirg’ichdan chiqarib olinadi, so’ng sharbati siqib olinadi. Sariyog’ idishga solinib, olovga qo’yiladi va qariyb suyuq holatgacha olib boriladi. Venchik bilan yaxshilab uriladi. Urishda davom etib, ingichka qilib quyultirilgan sut qo’shib boriladi. Shu tariqa massa havodor bo’lguniga qadar davom etiladi. Keyin kremga limon sharbati va qirg’ichdan chiqarilgan po’sti qo’shilib, aralashtiriladi. Krem tayyor.

Qaynatma (zavarnoy) krem

Qaynatma kremni suv hammomi yoki tubi qalin bo’lgan idishda tayyorlash mumkin. Bu pishirish vaqtida krem kuyib ketmasligi uchun kerak.

Bu krem uzoq saqlanmaydi, shuning uchun bu holda ham uni bevosita ishlatishdan oldin tayyorlash kerak. Agar uni bir muddat saqlab turish kerak bo’lsa, idish ustinini plastik plyonka bilan yopib, sovutgichga qo’yish mumkin.

Tuxum asosli qaynatma krem tayyorlash retsepti

Kerakli masalliqlar:

Sut — 250 ml
Tuxum — 4 dona
Shakar kukuni — 3-4 osh qoshiq
Vanil — pichoqning uchida

Pishirish jarayoni:

Ishni tuxumning oqini sarig’idan ajratib olishdan boshlash kerak. Oqlari barqaroq qilib ko’pirtirib olinadi. Sarig’ini shakar bilan yaxshilab aralashtirgan holda ustidan issiq sut quyiladi va faol aralashtirib turiladi. So’ng olovga qo’yib, qaynashgacha olib boriladi. So’ng olovdan olib, ko’pirtirilgan tuxum oqi va vanil qo’shiladi va aralashtirishda davom etiladi. Idish yana olovga qo’yiladi, aralashtirib turgan holda, unda 1-2 daqiqa ushlab turiladi. Krem tayyor, uni biroz sovutib olib, tortga iliqligida surtish kerak.

***

Ushbu kremlarni tayanch sifatida ishlatish va ularga turli xil boshqa masalliqlar qo’shib, o’zingizga yoqadigan ideal krem retseptini yaratishingiz mumkin.