Biskvitli rulet tayyorlash — usullari, retsepti, kerakli masalliqlar

Ingichka biskvitdan tayyorlangan rulet dasturxoningizni ajib tarzda bezatadi va mehmonlarni quvontiradi. Rulet tayyorlash juda oson, biroq ko’pchilik bekalar uni pishirishdan cho’chishadi. Ushbu maqolada uy sharoitida turli xil nachinkali: murabboli, mevali, quyultirilgan sutli va kremli ruletlar tayyorlash usullari ko’rib chiqiladi.

Yumshoq va mazali rulet retseptlari

Kerakli masalliqlar:

• Tuxum — 3-4 dona;
• Shakar upasi — ¾ stakan;
• Un — 1 stakan;
• Har qanday turdagi murabbo — quyuqrog’ini olgan yaxshi;
• Sariyog’ — shaklni yog’lash uchun.

Bu retsept rulet tayyorlashning eng oson usulidir, boshlang’ich pazandalarga aynan ushbu retseptdan foydalanish tavsiya etiladi.

Tayyorlash usuli:

1. Dastavval pechni yoqib olish va uni 170 ° C gacha qizdirishga qo’yish kerak. So’ng tuxumni ko’pirtirish uchun quruq idish olish talab etiladi.
2. Tuxumning oqini sarig’idan ajratib oling, sarig’ini bir chetga olib turing. Oqini shakar upasi bilan  mustahkam ko’pik hosil bo’lgunga qadar ko’pirtiring.
3. Sekin aralashtirishda davom etib, birma-bir tuxum sarig’ini qo’shishni boshlang. So’ng yaxshilab elangan un qo’shib, xamir tayyorlashda davom eting.
4. Un to’liq erigach, xamirni oldindan tayyorlangan protivenga solib, sirtini tekislang. 12 daqiqaga pishirishga pechga qo’ying.
5. Tayyor bo’lganini biroz ko’tarilgani va yuzasi qizarganidan aniqlash mumkin. O’ta aniqlik uchun gugurt cho’pi yordamida tekshirib ko’rsa bo’ladi.
6. Tayyor bo’lgan biskvitni issiqligida salfetkaga qo’yib, ustiga murabbo surting, so’ng rulet qilib o’rang.
7. Ruletni ehtiyotkorlik bilan dasturxonga tortiladigan shaklga qo’yib, chetlarini tekislang va ixtiyoringizga ko’ra ustidan shakar upasi seping. Sovugach, dasturxonga choy yoki qahva bilan tortish mumkin.

Quyultirilgan sutli rulet

Ushbu ruletni ham klassik, ham qaynatma suyultirilgan sut bilan tayyorlash mumkin. Ikkinchisi quyuqroq bo’lganligi sababli uni ishlatgan ma’qulroq. Nachinkaga qo’shimcha ravishda maydalangan yong’oq yoki bodom qo’shish mumkin.

Tayyorlanishi

Rulet xamiri ya’ni biskvit yuqoridagidek tayyorlanadi. Nachinkasi uchun klassik quyultirilgan sut olinadigan bo’lsa, uni teng proportsiyada sariyog’ bilan aralashtirib, urib, krem tayyorlash kerak. Qaynatma quyultirilgan sutni shundayligicha ishlatsa ham bo’ladi.

Biskvit ustiga quyultirilgan sut surtiladi va u rulet qilib o’raladi. Ustidan bezatish uchun shakar upasi sepish mumkin. Bir kechaga sovutgichda qoldiriladi, shirinlik tayyor!

Kremli shokoladli rulet

Ushbu rulet shokolad va krem kontrasti tufayli bayram dasturxoniga o’zgacha chiroy baxsh etadi.

Ushbu ruletni ichiga mevali nachinka solib, ustidan shokoladli glazur quyish ham mumkin.

Kerakli masalliqlar

Ruletning xamiri uchun:

• 3 ta tuxum;
• Yarim stakan shakar;
• 1 osh qoshiq asal;
• 50 gramm yuqori sifatli kakao kukuni;
• Yog’lash uchun sariyog’;
• 0,5 choy qoshiq iste’mol sodasi.

Kremi uchun:

• Yog’ligi 30% bo’lgan bir stakan smetana;
• ½ stakan shakar upasi;
• Bir stakan har qanday meva (ayniqsa, gilos bilan yaxshi chiqadi).

Shokolatli rulet tayyorlash ketma-ketligi

1. Idishda tuxum oqi va asal ko’piritib olinadi. Boshqa alohida idishda quruq masalliqlar (soda, kakao va un) aralashtiriladi.
2. Aralashtirishni to’xtatmasdan, oz-ozdan suyuq aralashma quyiladi (aksincha emas);
3. Tayyor bo’lgan xamir protivenga solinib, bir tekis qilinadi va 15 daqiqa davomida 200 °C gacha qizdirilgan pechda pishiriladi.
4. Biskvit pishguncha krem tayyorlanadi: idishda smetana va shakar upasi quyuqlashguncha uriladi;
5. Navbatdagi ish mevali nachinka tayyorlash: gilos donaklaridan tozalanadi, uning suvi biroz siqib tashlanadi, shunda uning sharbati rulet yonlaridan sizib chiqmaydi.
6. Tayyor biskvit pechdan chiqarib olinadi, biroz sovushi uchun qoldiriladi, agar xamir quruq bo’lsa. gilosning sharbati bilan uni namlab olish mumkin, shunda ruletni o’rash qulayroq bo’ladi;
7. Biskvitga yaxshilab krem surtiladi, chetiga bir qator qilib gilos teriladi (o’rash boshlanadigan tomoniga). So’ng biskvit rulet qilib o’raladi.
8. Ruletni bir necha soatga sovutgichga qo’yish tavsiya etiladi, shunda u yumshoq bo’ladi va yaxshi namlanadi.

Umuman olganda, ruletning kremiga qo’shimcha ravishda boshqa har qanday xush ko’ruvchi mevani qo’shsa bo’ladi. Masalan banan bu borada o’zini yaxshi oqlaydi.

Rulet tayyorlash: sirlari va foydali maslahatlar

• Doimo protiven ustidan pergament qog’oz to’shang. Shunda xamirni ajratib olish oson bo’ladi;
• Agar biskvit quruq bo’lsa, uni o’rashdan oldin shakarli sirop bilan biroz namlab oling, aks holda u o’rash vaqtida sinib ketishi mumkin;
• Agar pechda «konvektsiya» funktsiyasi bo’lsa, uni yoqish biskvitni yanada havodor qiladi;
• Xamirini tayyorlash uchun biskvit tayyorlash sahifasidagi tavsiyalar bilan tanishib chiqish ham mumkin.