Yarating, o'rganing, bilib oling

Ekler tayyorlash retsepti — pishiriq klassik varianti, uy sharoitida pishirish

Ekler tayyorlash retsepti — pishiriq klassik varianti, uy sharoitida pishirish

Ekler — fransuzcha desert, qaynatma xamirdan tayyorlanadigan yumshoq shirinlik. Ko’pincha nachinka sifatida qaynatma krem ishlatiladi, biroq o’zgacha ta’mlarni xush ko’radiganlar uchun maqolada shuningdek pishloq va tvorogdan tayyorlanadigan krem turlari ham keltirib o’tiladi.

Ekler uchun qaynatma xamir

Kerakli masalliqlar:

  • Un — 1 stakan
  • Suv — 1 stakan
  • Tuxum — 4 ta
  • Sariyog’ — 150 g
  • Tuz — yarim choy qoshiq.

Tayyorlanishi:

  1. Idishga suv quyiladi va qaynatiladi. Tuz, sariyog’ qo’shib aralashtiriladi va yana qaynashgacha olib boriladi. So’ng olov pasaytiriladi va kichik qismlar bilan un solib, aralashtirishda davom etiladi, keyin idish olovdan olinadi. Xamir sovugach, tuxum qo’shib (bittalab), yaxshilab aralashtiriladi.
  2. Protiven yog’lab olinadi va qandolat xaltachasi yoki namlab olingan qoshiq yordamida uzunchoq qilib xamir quyib chiqiladi. Har biri orasida kamida 2 sm dan joy qolishi kerak, chunki pishish davomida ularning hajmi kattalashadi.
  3. Ekler oldindan 200 °C gacha qizdirilgan pechda 30 daqiqa davomida pishiriladi. Pishiriq xamiri yaxshiroq ko’tarilishi uchun pech tubiga idishda suv qo’yish kerak. Ularning yuzasi biroz qizargach, pechdan darhol chiqarib olinadi.
  4. Qaynatma xamirli eklerlar tayyor, endigi navbat ularni krem bilan to’ldirish.

Ekler uchun krem retseptlari

Qaynatma krem tayyorlash

Kerakli masalliqlar:

  • Tuxum — 1 ta
  • Shakar — 1,5 stakan
  • Sut — 0,5 litr
  • Kraxmal — 2 osh qoshiq
  • Un — 2 osh qoshiq
  • Sariyog’ — 100 g
  • Vanillin — ta’bga ko’ra.

Tayyorlanishi

  1. Idishda sut, tuxum va shakar aralashtiriladi, so’ng olovga qo’yiladi. Alohida idishda ozroq miqdorda sutda kraxmal va un aralashtirib olinadi, bunda barchasi yaxshi erib, bir xil massa hosil qilish kerak. Sut qaynay boshlagach, aralashma sutga qo’shiladi, olov pasaytiriladi va tinimsiz aralashtirib turgan holda qaynaguncha kutiladi.
  2. Massa quyuqlashganda, idish olovdan olinadi. Krem biroz sovutiladi, so’ng vanilin va sariyog’ qo’shiladi, yaxshilab aralashtiriladi yoki mikser bilan uriladi. Eklerning kremi tayyor!
  3. Ingichka uchli qandolat xaltachasi yordamida pishiriqning pastki yoki yon tomoning ikki joyidan teshib, krem bilan to’ldiriladi. Tayyor shirinlikni ustidan shakar upasi sepib yoki glazur quyib, dasturxonga tortiq qilish mumkin.

Tvorogli krem

Kerakli masalliqlar:

  • Tvorog — 200 g
  • Shakar — 1 stakan
  • Qaymoq — 200 ml
  • Vanilin.

Tayyorlash:

Bir xil massa hosil bo’lguncha tvorog va shakar qaymoq qo’shib ezib aralashtiriladi. Vanilin qo’shiladi, mikser bilan urib biroz ko’pirtiriladi. Krem tayyor. Yuqoridagi usul kabi pishiriq ichiga kiritiladi.

Pishloqli krem

Kerakli masalliqlar:

  • «Mascarpone» pishlog’i — 250 g
  • Shakar upasi — 120 g
  • 20-22% yog’li qaymoq — 100 ml.

Tayyorlanishi

Pishloq, shakar va qaymoq mikser bilan yaxshilab aralashtiriladi va sovutgichga qo’yiladi. Biroz sovugach, eklerlar ichiga solinadi.

8
Loading...
Loading...

Sharh qoldirish

E-mail manzilingiz chop etilmaydi. To'ldirish zarur maydonlar * bilan belgilangan.