Mimoza salati tayyorlash — retsepti, bosqichlari, rasmlari

«Mimoza» salati — pazandalik klassikasi sanaladi. Maydalangan tuxum sarig’i bilan bezatilgan ushbu salat gullarni eslatib, dasturxonga bayramona qiyofa bag’ishlaydi, shuning uchun Mimoza salati bayram marosimlarida tez-tez tayyorlanadi. Salat juda yumshoq va to’yimli sanaladi, quyida uning klassik retsepti sizga havola etiladi.

Mimoza salati tayyorlash retsepti

Kerakli masalliqlar:

• Yog’da konservalangan baliq — 200 g (1 banka);
• Kartoshka — 300 g;
• Sabzi — 200 g;
• Piyoz — 100 g;
• Qattiq pishloq — 150 g;
• Mayonez — 250 g;
• Tuxum — 4 dona;
• Ko’katlar (kashnish, shivit) — 50 g;

Tayyorlash jarayoni

1. Ishni sabzi, kartoshka va tuxumni qaynatib olishdan boshlash kerak. Qaynatilgan mahsulotlar sovutilib, po’stlog’idan tozalanadi.
2. Qirg’ichning kichik tishidan sabzi, kartoshka, tuxumning sarig’i va oqi, pishloq chiqariladi. Barcha masalliqlar hozircha alohida idishchalarga solinadi.
3. Salat tayyorlanadigan likopchaga baliq yog’i bilan birgalikda solinib, sanchqi yordamida ezib, tekislanadi. Ustidan biroz mayonez surtiladi.
4. Baliq ustidan tuxumning oqi yoyiladi, yana bir qavat mayonez surtiladi. Tuxum oqidan so’ng navbat qirg’ichdan chiqarilgan sabziga keladi, u ham tekis qilib yoyiladi va ustidan mayonez surtiladi.
5. Piyoz mayda qilib to’g’raladi, idishga solinadi va ustidan qaynoq suv quyiladi. Shu tariqa achchig’i ketishi uchun 5-10 daqiqaga qoldiriladi.
6. Sabzi ustidan piyoz, piyoz ustidan esa kartoshka qo’yiladi. Tuz va mayonez qo’shiladi.
7. Keyingi navbatda pishloq teriladi, ustidan mayonez quyiladi va tekislanadi.
8. Va nihoyat salatning so’ngi qavatini tuxumning sarig’i va ko’katlardan tayyorlangan bezak egallaydi. Salat 2 soatga sovutgicha qo’yiladi, shundan so’ng u tayyor! Yoqimli ishtaha!

Tavsiyalar

• Qatlamlar orasiga mayonezni iloji boricha kamroq va bir tekis qilib yoyishga harakat qiling.
• Eng avvalo piyozni issiq suvga solib qo’ysangiz, qolgan ishlarni bajarguncha u tayyor bo’lib turadi.
• Xohishga ko’ra baliq va kartoshkaning o’rnini almashtirish mumkin, bu uning ta’miga ta’sir qilmaydi, biroq likopchani yuvish osonroq bo’lishi mumkin.
• Sovutgichga qoldirishga befarq bo’lmang, aks holda salatning qattiqligi yo’qoladi va u «uvalanib» keta boshlaydi.
• Konserva tanlashda uning sifatiga alohida urg’u bering, chunki salatga asosiy ta’mni aynan baliq beradi.
• Pishloq juda yumshoq bo’lsa, uni qirg’ichdan chiqarishdan oldini 10 daqiqa muzlatgichga qo’yish kifoya, shunda u yaxshi o’tadi.