Yarating, o'rganing, bilib oling

Beze tayyorlash retsepti — kerakli masalliqlar, tavsiyalar, sirlari

Beze tayyorlash retsepti — kerakli masalliqlar, tavsiyalar, sirlari

Beze tayyorlash retsepti juda oddiy, buning uchun tuxum oqlarini shakar upasi bilan urib ko’pirtirish kerak. Ba’zan limon sharbati qo’shish talab etilishi mumkin. Biroq desert havodor va mazali bo’lishi uchun tavsiyalarga qat’iy amal qilish va masalliqlar nisbatini bilish zarur.

Beze tayyorlash retsepti

Tayyorlash vaqti: 2 soat | Portsiyalar soni: 30-40 dona

Kerakli masalliqlar:

  • Tuxum — 3 ta;
  • Shakar — 180 g;
  • Limon sharbati.

Tayyorlanishi:

  1.  Tuxumning oqi sarig’idan ajratib olinadi. So’ng oq qismi mikser yordamida dastlab past tezlikda taxminan 30 soniya ko’pirtiriladi. Ko’pira boshlagach, tezlik o’rtacha ko’rsatkichga keltiriladi va quyuq ko’pik hosil bo’lguncha urishda davom etiladi.
  2. Keyingi bosqichda asta-sekin shakar upasi qo’shila boshlanadi. Upa qo’shib bo’lingach, mikser o’chiriladi va aralashma qoshiq yordamida idish chetiga sachragan oqsillarni tushirgan holda yengil aralashtirib olinadi.
  3. Shundan so’ng yakuniy ravishda mikserning eng yuqori tezligida aralashma mustahkam ko’pik hosil bo’lguncha yana bir bor ko’piritiriladi. Beze asosining tayyorligini bilish uchun idishni teskari qilish kerak: tayyor ko’pik joyida qoladi.
  4. Asos qandolat xaltachasiga solinadi. Albatta u bo’lmasa, qoshiqdan foydalanish ham mumkin. Yagona farq pishiriqning ko’rinishida bo’ladi.
  5. Duxovka 100 °C gacha qizdiriladi. Protivenga pergament qog’oz yoyilib, uning ustiga beze quyib chiqiladi. Duxovkaning o’rta qavatiga qo’yib, bezening kattaligiga qarab 1 — 1,5 soat pishirishga qo’yiladi.
    Beze asosini terib chiqish

Pishish davomida duxovka eshigini ochmaslik kerak. Aks holda haroratning keskin pasayishi tufayli desertda yoriqlar paydo bo’lishi mumkin.

Tavsiyalar

  • Beze uchun ishlatiladigan tuxum yangi bo’lmasligi tavsiya etiladi. Bir haftalik tuxumlar ayni muddao: ular yaxshiroq ko’piradi.
  • Tuxum oqini sarig’idan juda ehtiyotkorlik bilan ajratish kerak. Asosga hatto biroz miqdorda tuxum sarig’i tushsa ham uning ko’pirishi qiyin bo’ladi.
  • Ko’pirtirish uchun idish va miskerning nasadkalari quruq bo’lishi kerak. Oz miqdordagi suv yoki yog’ ko’pik hajmiga salbiy ta’sir ko’rsatadi.
  • Ushbu pishiriq uchun aynan shakar upasi kerak, shakarning o’zi emas. Agar shakar upasi bo’lmasa, oddiy shakarni tuyib olish ham mumkin.
  • Aralashma hajmini yo’qotmaslik uchun ko’pirtirishning so’nggi bosqichida 1 ta tuxum oqi uchun yarim choy qoshiq miqdorda limon sharbati qo’shish mumkin. Biroq mikser quvvati shundoq ham ko’piritishga yetadigan bo’lsa, qo’shish shart emas.
  • Pishiriq ta’miga ta’m qo’shish uchun unga oz miqdorda vanilin, dolchin, oziq-ovqat qo’shimchalari (aromatizatorlar va bo’yoqlar), maydalangan yong’oq yoki bodom, kakao, kokos qirindisi qo’shish mumkin. Ularning hammasi beze asosiga bevosita protivenga quyishdan oldin qo’shilishi kerak.
2
Loading...
Loading...

Sharh qoldirish

E-mail manzilingiz chop etilmaydi. To'ldirish zarur maydonlar * bilan belgilangan.