Teftel sho’rva tayyorlash — retsepti, tavsiyalar, bosqichma-bosqich + foto

Bir qarashda, teftel va frikadelkalar bir xildek tuyuladi, lekin ularning farqi bor. Frikadelkalarga albatta yangi non, ko’katlar, ziravorlar qo’shladi va ularni suvda yoki bulyonda qaynatiladi. Teftel go’shtli qiymasiga esa tuxum, piyoz, sabzavotlar qo’shiladi va teftellar dastlab qovuriladi ham. Quyidagi retseptda guruchli teftel sho’rva tayyorlash usuli batafsil ko’rib chiqiladi.

Teftel sho’rva tayyorlash retsepti

Kerakli masalliqlar

Teftel uchun:

• 300 g mol go’shtidan qiyma;
• 1 ta o’rtacha piyoz;
• 1 ta tuxum;
• 1/3 stakan guruch;
• Teftellarni belab olish uchun un;
• Ta’bga ko’ra tuz, qalampir, murch, quritilgan ko’katlar.

Sho’rvasi uchun:

• O’rtacha kattalikdagi sabzi — 1 ta;
• Yirikroq kartoshka — 1 ta;
• Bulg’or qalampiri — 1 ta;
• O’rtacha kattalikdagi piyoz — 1 ta;
• Pomidor — 1 ta;
• O’simlik moyi;
• Ko’katlar, 1-2 dona sarimsoq.

Teftel sho’rva tayyorlanishi

Dastlab sabzavotlarning po’stlo’gini archib olish kerak, shunda faqat ularni to’g’rash qoladi. Birdan olovga taomning sho’rvasi uchun 1,5-2 litr suv ham qo’yish kerak, boshqa bosqichlarni bajarguncha u qaynab turadi.

1. Qiyma, mayda qilib to’g’ralgan piyoz, 1 ta tuxum va yuvilgan guruch aralashtiriladi. Qiymaning tuzi rostlanadi va ta’bga qarab qalampir qo’shiladi. Qiyma yaxshilab aralashtirilgach, ulardan namlangan qo’llar bilan yong’oqdan biroz katta o’lchamdagi teftellar yasaladi, so’ng barchasi unga belab olinadi.
2. Teftellar o’simlik moyida bir necha tomonidan qizartirib qovurib olinadi. So’ng ular yog’dan olinib, qaynab turgan suvga tushiriladi.
3. Tefteldan qolgan yog’ga kichik kubik qilib to’g’ralgan piyoz va ezilgan sarimsoq solinib, tillarang tusga kirguncha qovuriladi. So’ng sabzi kalta, biroz yo’g’onroq somoncha shaklida to’g’raladi, ozroq yumshagunicha piyozga qo’shib qovuriladi. Ketidan to’rtburchak qilib to’g’ralgan bulg’or qalampiri solinadi, u ham qovurish uchun boshqa sabzavotlar solingan tovaga tushiriladi.
4. Nihoyat sabzavotlarga mayda qilib to’g’ralgan pomidor yoki bir osh qoshiq tomat pastasi solinadi. Yana 3 daqiqa qovurib olinadi. Sho’rvaning qovurdog’i tayyor.
5. Kartoshka o’rtacha kattalikdagi kubik shaklida to’g’raladi, suvga tefteldan solinganidan keyin 10 daqiqa o’tib qozonga tashlanadi.
6. 5 daqiqadan keyin sho’rvaga qovurilgan sabzavotlar solinadi. Tuzi rostlanadi, ta’bga ko’ra qalampir qo’shiladi. Qozonning qopqog’i yopiladi, 5 daqiqa qaynagach, olov juda past qilinadi va yana kamida yarim soat qaynatiladi.

Mazkur sho’rva juda to’yimli taomdir. Dasturxonga smetana yoki suzma va ko’katlar bilan tortiq qiliadi. Yoqimli ishtaha!