Turkcha somsa retsepti — tayyorlash bosqichlari + foto

Uy sharoitida tayyorlangan turkcha somsa nafaqat tamaddi uchun mukammal variant, balki mehmonlarni siylash uchun ham ajoyib taom bo’ladi. Ishtaha ochar obdor nachinka, qarsildoq xamir — juda mazali!

Turkcha somsa tayyorlash retsepti

Kerakli masalliqlar:

• Margarin yoki sariyog’ — 250 g;
• Smetana — 250 g;
• Un — 750-850 g;
• Iste’mol sodasi — 1 chimdim;
• Qiyma go’sht — 500 g;
• Kartoshka — 2-3 dona;
• Piyoz — 2-3 dona;
• Tuz, murch, ziravorlar — ta’bga ko’ra;
• Tuxum — 1 dona;
• Kunjut — 1 osh qoshiq.

Tayyorlanishi

1. Chuqurroq idishga iste’mol sodasi qo’shgan holda un elab solinadi.
2. Muzlatilgan sariyog’ (sifatli margarindan ham foydalanish mumkin) pichoq yoki qirg’ichdan chiqarish orqali maydalanadi. So’ng unga qo’shib, qo’llar yordamida bir xil massadagi ushoq xosil bo’lguncha aralashtiriladi.
3. Keyin aralashmaga sekin-asta smetana qo’shgan holda (u biroz ko’proq yoki kamroq kerak bo’lishi mumkin) xamir qoriladi. Xamirdan zuvala yasalib, bir muddat sovutgichga qo’yiladi.
4. Ayni paytda somsa uchun nachinka tayyorlanadi. Piyoz mayda kubik shaklida, kartoshka esa ingichka somonchalar shaklida to’g’rab olinadi yoki qirg’ichning yirik tishi orqali o’tkaziladi. Masalliqlar qiymaga qo’shiladi.
5. Qiymaga ta’bga ko’ra tuz va murch solinadi. Xush ko’ruvchilar boshqa ziravorlar yoki quritilgan ko’katlar qo’shishlari ham mumkin. Barchasi yaxshilab aralashtiriladi va tayyor bo’lgan aralashmadan kichik ovalchalar shakllantiriladi.
6. Xamir un sepilgan yuzaga qo’yiladi va yupqa qilib yoyiladi. So’ng o’rtacha kenglikdagi uzunchoq kesimlarga ajratib olinadi. Turkcha somsa yanada chiroyli ko’rinishi uchun xamirni shakldor pichoq yordamida kesish mumkin.
7. So’ngra barchasi juda oddiy: har bir xamir bo’lagiga nachinka qo’yib o’rash va chetlarini mahkam qilib yopishtirib chiqish lozim.
8. Somsaning yuza qismiga tuxum surtib, biroz kunjut sepiladi. Yog’langan yoki pergament yoyilgan protivenga bir tekis qilib terib chiqib, 180 °C gacha qizdirilgan pechda 35-40 daqiqa davomida pishiriladi.
9. Turk somsasi tayyor. Biroz sovigach, dasturxonga tomatli sous yoki sirka eritmasi va issiq choy bilan tortiq qilish mumkin. Yoqimli ishtaha!