Uy sharoitida sochlarni bo'yash - tabiiy bo'yoqlar, sochni qoraytiruvchi vositalar

Uy sharoitida sochlarni bo’yash — tabiiy bo’yoqlar, sochni qoraytiruvchi vositalar

Uy sharoitida sochni tim qora qilib bo’yash uchun nima qilish kerak? Bu savol ko’pchilik tomonidan berilishi mumkin. Oqargan sochlarni bo’yash uchun basma va xinadan foydalansa bo’ladi. Sochlarni qora qilish uchun ularni basma va xina aralashmasi, agar yanada chiroyliroq rang hosil qilishni xohlasangiz, xina va qora qahva aralashmasi bilan bo’yash mumkin.

Uy sharoitida sochlarni bo’yash

Qora, jiggarrang sochlarga oq oralagan bo’lsa, soch yuvilgandan so’ng achchiq qora choy damlamasi bilan (1 l suvga 2 osh qoshiq choy) chayiladi.
Agar oqargan sochlarga tezda rang berishni istasangiz, achchiq qora choy damlamasi (1\4 litrga bir choy qoshiq)ni xuddi shu miqdordagi qahva yoki kakao kukni bilan aralashtirib, sochga surting.
4 osh qoshiq yong’oqning yashil po’sti 2 stakan suvda 10 daqiqa qaynatiladi. Tindirilib, yuvilgan toza sochlarga surtiladi. Bu damlama sochlarga jigarrang tus beradi.
Sariq rangli oqargan sochlarga chiroyli oqish rang berish uchun, har safar soch yuvilgandan so’ng sirkali suvda chayiladi.
Sochlarga doimiy ravishda zaytun moyi surtish soch oqarishini oldini oladi.
Moychechak damlamasi och rangli yoki oqargan sochlarga tillarang tus beradi. Buning uchun 100 gr. moychechak gullari 0.5 l qaynoq suvga solinib, 30-40 daqiqa tindiriladi. Damlama yaxshilab sochlarga surilgach, 1 soatga qoldiriladi. So’ng chayiladi. Agar bu muolaja kun ora qilinsa, sochlar chiroyli tillarang tusga kiradi.

Sochni bo’yash usullari

Sochni turli kimyoviy vositalarsiz qoraytirishning boshqa usullari ham mavjud.

Sochni qora rangga bo’yash uchun yaxshi tabiiy vosita — bir finjon 1: 4 nisbatda basma va xina aralashmasi. Qanday markadagisi ahamiyatga ega emas, lekin sochlarni faqat basmaning o’zi bilan bo’yashga urinmang, aks holda siz qora emas, kutilmagan rangli sochlarga ega bo’lib qolasiz, masalan yashil. Tayyorlangan kukunga qaynoq suv solib, bo’tqa holiga kelguncha yaxshilab aralashtiring. Tayyor bo’lgan vositani sochlaringizga surting, sochiq bilan o’rab qo’ying va 6-8 soatdan keyin sochlaringizni shampun ishlatmasdan yuvib tashlang. Sochlar quriganida, ko’zguda butunlay boshqa kishini ko’rgandek bo’lasiz.

Sochlarni basma va xina bilan bo’yash afzalligi, ular kimyoviy bo’yoqlardan farqli o’laroq, sochlar tuzilmasiga zarar yetkazmaydi, balki uni himoyalaydi, qalin, sog’lom va porloq qiladi. Xina tufayli sochlar ultrabinafsha nurlar, tuz, shamol, xlor va boshqa atrof-muhit omillari salbiy ta’siridan himoyalanadi va sog’lom ko’rinish oladi.