Yuz uchun niqob — yog’li, quruq, normal yuz terisi uchun uy sharoitida niqoblar tayyorlash

Ko’zingiz ostidagi doiralar tashvishantirmoqdami? Yuzingiz charchagan ko’rinadimi? Yuzingizni tiniq va silliq qilishni xohlaysizmi? Shunday bo’lsa, buning uchun uy sharoitida tayyorlanadigan yuz uchun niqoblar yordam beradi! Maqolada tabiiy vositalardan tayyorlanadigan, terini yumshatuvchi, oziqlantiruvchi va namlovchi niqob retseptlari keltiriladi.

Niqob qanday qilib qo’llaniladi

Uy sharoitida niqoblar yuzga quyidagi tarzda suriladi:

• Dastlab teri tozalanadi. Yuzingizni yuving, so‘ng losyon yordamida tozalang. Yumshoq skrab bilan yumshoq piling qilish ham mumkin.
• Yuzdagi teshikchalar ochilib, niqob tarkibidagi moddalar teriga yaxshiroq singishi uchun yuzni bug‘lab yumshatgan ma’qul. Buning uchun qaynoq vanna qabul qiling yoki yuzingizni qaynoq suv solingan idish og‘ziga tutib turing.
• Endi niqobni surish mumkin. Vaqtni belgilang va bo‘shashing.
  Niqobni yuvib tashlashga kirishing. Uni ehtiyotkorlik bilan, iliq suvda, yaxshisi sovunsiz yuvish zarur (agar yuzdan ketishi qiyin bo‘laversa, sovun ishlatish mumkin). Ba’zi niqoblarni esa oddiy salfetka bilan tozalab olish mumkin.

Yuz terisi turini aniqlash

Yuz terisi yog’lilik darajasini aniqlash uchun ushbu amalni bajaring. Yuzingizni sovun bilan yuvib tashlang, bir yarim soatdan keyin teriga ingichka qog’oz qo’ying, yuzingizni butun yuzasi bo’ylab yaxshilab bosing, qog’ozni oling va unda nechta yog’li dog’lar mavjudligiga qarang.

• Agar yuzingiz yog’li terili bo’lsa, qog’ozning 5 ta joyida dog’ mavjud bo’ladi: peshona, iyak, yonoqlar va burun sohasida.
• Agar teringiz normal yoki kombinativ bo’lsa, siz 3 ta dog’larni ko’rasiz: peshona, shuningdek, burun va iyak sohasida.
• Agar teri quruq bo’lsa, qog’oz toza qoladi — uning yuzasida yog’li dog’lar bo’lmaydi.

Yuz uchun niqoblarni qanday tayyorlash kerak

• Uyda tayyorlanadigan niqob retseptini diqqat bilan o’qib chiqing, barcha kerakli masalliqlarni oling va uni tayyorlash uchun idish oling;
• Niqobning tarkibiy qismlarini yaxshilab aralashtiring;
• Yuzingizni skrab yoki tonik bilan tozalang;
• Niobni yuzga tekis, yengil haraktlar bilan surting, terini ishqalash yoki bosish tavsiya etilmaydi;
• Yuzda niqob 15-20 daqiqa ushlab turiladi, bundan ko’p emas.

Yog’li yuz terisi uchun niqoblar

Asaldan

1 dona tuxum oqini 1 choy qoshiq asal bilan aralashtiring. So’ngra 1 choy qoshiqdan sut va limon sharbati va bir necha tomchi bodom yog’i qo’shing. 20 daqiqa davomida yuzingizga surtib qo’ying. Yuz terisi tiniqlashib, ravshanlashadi.

Pomidordan

1 dona pomidorni qirg’ichdan o’tkazing. 1 choy qoshiqdan limon va sabzi sharbati qo’shib, aralashtiring. Niqobni yuzda o’n daqiqa ushlab turgach, iliq suvda yuvish lozim. Keyin oziqlantiruvchi krem surtishni unutmang.

Tinchlantiruvchi niqob

2 osh qoshiq quyuq yogurtga 2 osh qoshiq sut va yarim osh qoshiq kartoshka kraxmalidan qo‘shing. Aralashtirib, hosil bo‘lgan massani yuzga suring. 15 daqiqadan so‘ng sovuq suv bilan yuvib tashlang. Bu niqob terini ortiqcha yog‘dan xalos qiladi va mayinlashtiradi.

Har qanday niqobni surishdan oldin terini tozalashni, surib bo‘lgach esa, biroz namlantiruvchi krem surishni unutmang. Shunda natija yanada sezilarliroq bo‘ladi.

Quruq yuz terisi uchun niqoblar

Tvorogdan

1 choy qoshiqdan tvorog va kefirni yarim choy qoshiq asal bilan yaxshilab aralashtiring. Niqobni tozalangan yuzga surtgach, 20 daqiqadan so’ng qaynatib olingan iliq suv bilan yuving.

Banandan

Yarimta bananni sanchqi bilan ezing. Pyure holiga kelgan bananni nafaqat yuz, balki bo’yin terisiga ham surtish mumkin. 15-20 daqiqadan so’ng iliq suvda yuvish lozim.

Normal yuz terisi uchun niqoblar

Moychechakdan

Uy sharoitida niqob tayyorlash uchun moychechak, na’matak va yalpiz o’simliklarining har birini 1 osh qoshiqdan o’lchab, yarim litr qaynagan suvga damlang. Biroz iligach, dokadan o’tkazib, alohida idishga soling. 3-4 qavat dokani damlamada namlab, yuzingizga qo’ying. 10-15 daqiqadan so’ng dokani olib, yuz uchun mo’ljallangan, tarkibida A vitamini mavjud kremdan surting.

Guruchdan

1 osh qoshiq guruchni qahvamaydalagichdan o’tkazib, 1-2 osh qoshiq sut bilan aralashtiring. Niqobni yuz terisiga surtib, 15 daqiqadan so’ng iliq suvda chaying.

Oqsilli niqob

Bitta tuxum oqini 1 osh qoshiq bug‘doy uni va 1 choy qoshiq asal bilan aralashtiring. Hosil bo‘lgan massani yuzingizga suring. O‘n daqiqadan so‘ng nam paxta bilan artib tashlang. Bunday niqobdan keyin teri mayinlashadi va tetiklashadi.