Do’lma tayyorlash — uzum barglaridan kovatok retsepti

Tokli do’lma (kovatok) uzum barglaridan tayyorlanadigan nafaqat o’zbek, balki kavkaz, turk va yunon oshxonalarining mashhur taomlaridan biridir. Do’lma guruch, go’sht, baliq, sabzavot yoki yong’oq bilan bo’lishi mumkin. Taomning nomi tukcha fe’l — to’lmoq so’zidan olingan. Maqolada taomning klassik turi — go’shtli do’lma tayyorlanishi retsepti keltiriladi.

Tokli do’lma tayyorlash retsepti

Ushbu retsept uchun ta’bga ko’ra qo’y yoki mol go’shtidan foydalanish mumkin.

Kerakli masalliqlar:

• Uzum barglari — 60 dona
• Go’sht — 1 kg
• Bulyon (sabzavot yoki go’shtli) — 1 litr
• Guruch — 200 g
• Piyoz — 2 ta
• Sarimsoq — 1 dona
• Petrushka (yangi to’g’ralgan) — 1 choy qoshiq
• Yog’ — 2 choy qoshiq
• Murch, tuz, ziravorlar — ta’bga ko’ra

Tayyorlanishi

1. Dastlab uzum barglari 2-3 soat davomida sovuq suvda ivitib olinadi.
2. Guruchga iliq suv quyiladi va bir chetga olib qo’yiladi.
3. Go’sht mayda qilib to’g’raladi yoki qiymalagich orqali chiqarib olinadi.
4. Kattaroq idishda guruch, petrushka, mayda qilib to’g’ralgan sarimsoq va piyoz, go’sht, ziravorlar, tuz va murch aralashtirib olinadi.
5. Yoyilgan uzum barglariga yarim osh qoshiqdan go’shtli aralashma solib, ular tugib chiqiladi. Bunda dastlab bargning ikki cheti bukiladi, so’ng rulet qilib o’raladi.
6. Qozon tubiga do’lma chokini pastga qaratgan holda bir qator qilib terib chiqiladi. Barglar qaynash chog’ida ochilib ketmasligi uchun ularning usti likopcha bilan bosib yopiq qo’yiladi.
7. So’ng ustidan tayyor bulyon quyiladi. Bulyon do’lmalar sathidan 2 sm baland bo’lishi kerak. O’rta olovda 30-40 daqiqa davomida pishiriladi.
8. Dasturxonga suzma yoki smetana bilan tortiq qilinadi.

Do’lmani huddi shu tarzda boshqa taomlarga qo’shgan holda pishirish mumkin. Masalan dimlamada go’sht o’rniga yoki osh palovga qo’shimcha sifatida. Yoqimli ishtaha!