? Olmali pirog tayyorlash retsepti — sharlotka, klassik variantlari, sirlari

Olmali pirog tayyorlash retseptlari juda ko’p. Biroq, eng ko’p xush ko’rib iste’mol qilinadiganlari sanoqli. Biz maqolada ikkita eng mashhur piroglar retseptini ko’rib chiqamiz.

Oddiy olmali pirog

Ushbu mazali pishiriqning xamiri zich, biroq yoqimli bo’laklanadigan darajada bo’ladi. Retseptda pirog yanada bamaza chiqishi uchun ba’zi ayyorliklar va pishirish sirlari ham aytib o’tiladi.

Kerakli masalliqlar:

• Shakar — 175 g;
• Un — 180 g;
• Tuxum — 1 ta;
• Qabartma tuz — 1,5 choy qoshiq;
• Dolchin — yarim choy qoshiq;
• Sariyog’ — 1 osh qoshiq;
• Sut — yarim stakan;
• O’lchamiga qarab 2-3 ta olma.

Tayyorlanishi:

1. Kichikroq idishda un, dolchin va qabartmani birlashtiring. Ularni aralashtirib olish kerak, yaxshisi venchik yordamida. Qancha yaxshi aralashtirilsa, xamir shunchalik tekis va bir xilda chiqadi.
2. Boshqa kattaroq idishda xona haroratidagi sariyog’ va shakar aralashtiriladi. Mikser bo’lsa, uning yordamida aralashtirish maqsadga muvofiq. Xamir tayyorlashning ushbu usuli xamirni ko’proq ushaluvchan bo’lishiga yordamlashadi, olmali pirogda esa bu ayni kerakli xossa.
3. Shakar va sariyog’ aralashmasiga bitta tuxum chaqib solinadi va yana biroz aralashtiriladi, so’ng sut quyiladi.
4. Aralashmaga tayyorlab olingan un qo’shiladi, so’ng qoshiq yordamida xamir xosil bo’lguncha ehtiyotkorlik bilan aralashtiriladi.
5. Olma tilim shaklida kesib olinadi (po’stidan tozalashni unutmang). Nordon va shirin olmalar aralashmasi bo’lsa pirogning ta’mi yanada ajoyib chiqadi.
6. Pishirish uchun idish biroz yog’lanadi, so’ng tayyor xamir solib, tekislanadi, ustidan o’zingizga yoqqan usulda olmalar terib chiqiladi. Ko’pchilik olmani xamirning o’rtasiga solish afzal emasmi deb so’rashi mumkin. Bunday usulni xush ko’ruvchilar uchun quyidagi retsept mos keladi. Bu retseptda xamirning konsistentsiyasiga boshqa narsa aralashmasligi kerak.
7. Olmalar terilgach, uning ustidan biroz shakar va dolchin aralashmasidan sepish kerak. Bu pirog rangini ishtaha ochadigan qiladi.
8. So’ng shakl 180 °C gacha qizdirilgan duxovkaga 10-15 daqiqaga qo’yiladi. Keyin haroratni 155 °C gacha tushirib, yana 30-60 daqiqa pishirishda davom etiladi.
9. Vilka yordamida pirog tayyorligi tekshirib ko’riladi — agar pirogga sanchib ko’rilganda u quruq chiqadigan bolsa, demak pishiriq tayyor (ammo birinchi yarim soat ichida pechni ochmang, aks holda xamir ko’tarilmay qoladi).

Pirogni shaklning o’zida sovutishga qoldiring, so’ng ajratib oling. Dasturxonga yozning kunida muzqaymoq, qishda esa xushbo’y choy bilan tortiq qilinadi. Yoqimli ishtaha.

Sharlotka retsepti

Olmali pirog tayyorlash deganda 99% foiz odamlarning fikriga birinchi bo’lib «Sharlotka» retsepti kelsa ajabmas. Uni tayyorlash juda oson. Xamirini boshqa turdagisi bilan almashtirish istagida bo’lsangiz, oddiy pirog tayyorlash retsepti bilan tanishib chiqishingiz mumkin.

Kerakli masalliqlar:

• Shakar — 1 stakan;
• Un — 1 stakan;
• Tuxum — 3 ta;
• Sariyog’ — 1 osh qoshiq;
• O’lchamiga qarab 4-5 ta olma.

Tayyorlash jarayoni:

1. Tuxum va shakarni yaxshilab urib ko’pirtirib oling, so’ng un qo’shing va urishda davom eting.
2. Olmalarni kubik yoki tilim shaklida kesib oling.
3. Pishirish idishini yaxshilab yog’lab, olmalarni bir qator qilib terib chiqing va ustidan xamirni quying. Shuningdek, bir qavat xamir, so’ng olma va ustidan yana xamir quyish ham mumkin.
4. Shaklni oldindan 180 °C gacha qizdirilgan pechga qo’ying, tillarang tusga kirguncha 30-40 daqiqa davomida pishiring.
5. Tayyorligini yuqoridagi kabi usulda tekshirib ko’ring. Olmali pirog tayyor.